حسام ميمڻ
11مارچ 2012
صحيح چيو هيو شيخ اياز ته “اردو رابطي جي ٻولي آهي، پر رابطي جي ٻوليءَ جو مطلب اهو نه آهي ته هر رابطي جي ٻولي قومي ٻولي هوندي آهي.”
سنڌين جي قومي ٻولي سنڌي آهي ۽ ان جي هڪ الڳ ۽ پراڻي تاريخ آهي، جنهن کي رد ڪري نٿو سگهجي، گهٽ ۾ گهٽ رابطي جي ٻولي اردو، جيڪا لشڪري ٻولي به سڏجي ٿي، ان کي اها جاءِ نٿي ڏئي سگهجي، جيڪا سنڌيءَ جي آهي، تنهنڪري، رابطي جي ٻولين کي قومي زبانن مٿان زور جو ٿاپي نٿو سگهجي.
مونکي ته ان ڳالهه تي حيرانگي ٿيندي آهي ته اسان ماڻهو اردو جلد سکي ويندا آهيون، ڪيئن سکي ويندا آهيان، ڪا خبر ئي نه پوندي آهي، سکڻ چاهيون يا نه، پر سکي ويندا آهيون. گهڻو ڪري سنڌي سمورا اردو ڳالهائي ويندا آهن، پر اردو ڳالهائيندڙ ڏاڍا محدود لڳندا آهن، انهن ۾ اها صلاحيت گهٽ هوندي آهي ته اهي سنڌي ڳالهائين. هڪ سبب اهو به ٿي سگهي ٿو ته انهن کي اهڙو ماحول نه ملندو آهي، هو اڪثر پاڻ ۾ جيئندا آهن، ڪراچيءَ ۾ رهندڙ اردو ڳالهائيندڙ سنڌي ٻوليءَ کان اڪثر بي بهرا آهن، پر اسان وارا ماڻهو مڙئي ڪم ڪڍي ويندا آهن، پر جيڪي اردو ڳالهائيندڙ اتر سنڌ ۾ رهن ٿا، اهي سنڌي ڳالهائيندا آهن.
اردوءَ کي رابطي جي ٻولي ئي رهڻ ڏجي، پر اردوءَ کان وڌيڪ انگريزيءَ جي ضرورت آهي، ڇو ته انگريزي عالمي ٻولي آهي، ڪمپيوٽر جي ٻولي آهي، دنيا جو وڏي ۾ وڏو لٽريچر به ان ٻوليءَ ۾ آهي، انگريزي ٻولي اچڻ اڄ جي دور جو هڪ وڏو هنر به آهي، انڪري، اردوءَ کان وڌيڪ انگريزي سکڻ جي ضرورت آهي ۽ ياد رهي ته انگريزي، اها ٻولي آهي، جيڪا اسان ننڍي هوندي کان سکڻ جي ڪوشش ڪري رهيا آهيون ۽ اسان کي ايتري به نٿي اچي، جيتري اردو ايندي آهي.
مون پڙهيو آهي ته رچرڊ برٽن، جيڪو سنڌ جي تاريخ، روايتن، ڏنڪٿائن کان ويندي،نشي پتي ۽ موالين تي به انگريزيءَ ۾ لکي ويوآهي، ان ماڻهوءِ کي 23 ٻوليون اينديون هيون، ٻولي هڪ اظهار جو رستو آهي، انڪري، جيترو ٿي سگهي ٻوليون سکجن، پر انگريزي عالمي ٻولي آهي، ۽ خاص طور تي نوجوان لاءَ انتهائي ضروري آهي، ڇو ته اها نوڪريءَ جو ذريعو به آهي ته انٽرنيٽ جي ٻولي به آهي، تنهنڪري، هن جي ضرورت بهرحال، ضروري آهي.
No comments:
Post a Comment